தமிழ்த் தேசியத் தலைவரால் மிகவும் நேசிக்கப்பட்ட தமிழ்த் திரையுலகத்தின் தலைமகன் இயக்குநர் இமயம் பாரதிராஜா காலமானார் !

தமிழ் திரையுலகின் ஒரு பொற்காலம் முடிவுக்கு வந்தது

தமிழ் திரைப்பட உலகின் தலைசிறந்த படைப்பாளிகளில் ஒருவராகவும், “இயக்குநர் இமயம்” என்று ரசிகர்களாலும் திரையுலகினராலும் போற்றப்பட்ட பாரதிராஜா இன்று காலமானார்.
அவருக்கு வயது 84.

வயது முதிர்வால் ஏற்பட்ட உடல்நலக் குறைபாடுகள் காரணமாக சென்னை இல்லத்தில் அவர் உயிரிழந்ததாக தகவல்கள் தெரிவிக்கின்றன. அவரது மறைவு தமிழ் திரையுலகிற்கு ஈடு செய்ய முடியாத இழப்பாகக் கருதப்படுகிறது.

1977ஆம் ஆண்டு வெளியான 16 வயதினிலே திரைப்படத்தின் மூலம் இயக்குநராக அறிமுகமான பாரதிராஜா, தமிழ் சினிமாவின் கதை சொல்லும் முறையையே மாற்றியமைத்தவர். அதற்கு முன்பு பெரும்பாலும் ஸ்டுடியோ அரங்குகளுக்குள் மட்டுமே நடைபெற்ற திரைப்பட படப்பிடிப்புகளை கிராமங்களின் இயற்கைச் சூழலுக்குக் கொண்டு சென்ற பெருமை அவருக்கே சேரும். அவரது படைப்புகள் தமிழ் மண்ணின் மண்வாசனையையும், கிராமிய வாழ்க்கையின் உண்மைகளையும், மனித உணர்வுகளின் ஆழத்தையும் திரையில் உயிர்ப்பித்தன.

கிழக்கே போகும் ரயில், அலைகள் ஓய்வதில்லை, முதல் மரியாதை, கடலோரக் கவிதைகள், கருத்தம்மா, வேதம் புதிது உள்ளிட்ட பல படங்கள் தமிழ் சினிமாவின் காலத்தால் அழியாத படைப்புகளாக இன்று வரை நினைவுகூரப்படுகின்றன. பல தேசிய விருதுகள் மற்றும் மாநில விருதுகளை வென்றுள்ள அவர், பல தலைமுறை நடிகர்கள், இயக்குநர்கள் மற்றும் தொழில்நுட்ப கலைஞர்களின் வழிகாட்டியாக விளங்கினார்.

சமீப ஆண்டுகளில் உடல்நலக் குறைபாடுகளால் அவதிப்பட்டு வந்த பாரதிராஜா, கடந்த ஆண்டு தனது மகனும் நடிகருமான மனோஜ் பாரதிராஜாவை இழந்த துயரத்திலிருந்தும் முழுமையாக மீள முடியாமல் இருந்ததாக குடும்பத்தினர் தெரிவித்திருந்தனர். அவரது உடல்நிலை கடந்த சில மாதங்களாக கவலைக்கிடமாக இருந்ததாகவும் தகவல்கள் வெளியாகியிருந்தன.

பாரதிராஜாவின் மறைவு செய்தி வெளியாகியதும் அரசியல் தலைவர்கள், திரைப்பட பிரபலங்கள் மற்றும் ரசிகர்கள் சமூக வலைதளங்களில் இரங்கல் தெரிவித்து வருகின்றனர். “தமிழ் சினிமாவின் ஒரு சகாப்தம் முடிவுக்கு வந்துவிட்டது”, “மண்வாசனை சினிமாவின் தந்தை” என பலரும் அவரை நினைவுகூர்ந்து அஞ்சலி செலுத்தி வருகின்றனர்.

கிராமிய வாழ்வியலை உலக அரங்கில் அறிமுகப்படுத்திய இயக்குநர் இமயம் பாரதிராஜா மறைந்தாலும், அவரது படைப்புகளும் அவர் உருவாக்கிய சினிமா மொழியும் என்றும் தமிழ் மக்களின் நினைவில் நிலைத்திருக்கும்.

தமிழ்த் தேசியத் தலைவரால் மிகவும் நேசிக்கப்பட்ட தமிழ் இயக்குநர்களின் மூத்தவர் பாரதிராஜா. இவரிடம் தமிழ்த் தேசியத்துக்காக ஒரு திரைப்படம் இயக்கவேண்டு என்று தேசியத் தலைவர் வேண்டுகோள் விடுத்திருந்ததும் குறிப்பிடத்தக்கது.